ढगाएवढा राक्षस
काळा काळा कुट्‌ट,
डोंगरदरीत निखळून पडलाय
त्याचा मोठ्ठा बूट !
काळोखातील वडावरुन
भूत मारते उडी,
पारंब्यांतून त्याची मला
लांबून दिसते दाढी !
रात्री माझ्या स्वप्‍नात येते
सोनचाफी कळी
हळूच उघडते डोळे आणि -
होते तिची परी !
कधी कधी उडत येतो
रुख पक्षी घरी,
पाहयला जातो लटकून त्याला
सिंदबादची दरी !
धपकन खाली दरीत पडतो
- आणि उघडतो डोळे,
कसा कुठून जाऊन आलो
काहीच कसे नकळे !
आई म्हणते, "काय रे झाले,
पाहतोस काय खालीवर ?"
गंमत जंमत सांगू कशी
कसा गेलो वर वर ?
काळाकुट्ट मोठ्ठा राक्षस
कसा होता सांगू मी ?
कशी नाचली सोनपरी
नाचून कसा दाखवू मी ?
"थांब आई, सांगतो तुला
कशी होती सोनपरी
अन् दाखवतो काढून तुला
हिर्‍या-माणकांची खोल दरी !"
पेन्सिल घेऊन कागदावर
राक्षसाचा काढला कान,
माझ्या मनातल्या स्वप्नांची
चित्रे झाली छान छान !!
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
