नदीबाई माय माझी
डोंगरात घर
लेकरांच्या मायेपोटी
येते भूमीवर ॥
नदीबाई आई माझी
निळे निळे पाणी
मंद लहरीत गाते
ममतेची गाणी ॥
नदीमाय जळ सार्‍या
तान्हेल्यांना देई
कोणी असो कसा असो
भेदभाव नाही ॥
शेतमळे मायेमुळे
येती बहरास
थाळीमध्ये माझ्या भाजी-
भाकरीचा घास ॥
श्रावणात आषाढात
येतो तिला पूर
पुढच्यांच्या भल्यासाठी
जाई दूर दूर ॥
माय सांगे, थांबू नका
पुढे पुढे चला ॥
थांबत्याला पराजय
चालत्याला जय ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
