आला श्रावण पुन्हा नव्याने
होऊन चिंब विभोर
नाचतो, थुई थुई मनमोर !
लेणे लेवुनी अंगी भर्जरी
येति सरीवर सरी कितीतरी
कधी तुषार, तर कधी सांडती
सुरेख थेंब टपोर
नाचतो, थुई थुई मनमोर !
सरीत भिजती केशर उन्हे
जणू दुपारी पडे चांदणे
बघून हसले, मन हर्षाने
भरुन येई शिगोर
नाचतो, थुई थुई मनमोर !
रंग मनाचे उजळुन येती
गंध फुलांचे त्यात मिसळती
इंद्रधनूही नभी अंगणी
हळूच येई समोर
नाचतो, थुई थुई मनमोर !
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
