तेवढ्यात एक मोठा बोका निद्राजितावर चालून आला. तिने त्याला जोराचा झटका देऊन उडवून लावलं. तो जमिनीवर आपटून ठिणग्या निघत फुटला. म्हणजेच तो यांत्रिक बोका होता.
पुढे सुनिल म्हणाला, "ओके. म्हणजे 6 तारखेला सुपर नेचर वरून निघण्यापूर्वी आपण त्या दंडगोलाकार वस्तूमधून काळजीपूर्वक बाहेर काढलेल्या "बिग कोलॅप्स निगेटिव्ह व्हायरस लिक्विड" चा वापर करून सुपर नेचर वरच्या तीन प्राण्यांचे पेशीसमूह तयार करून सोबत आणले होते त्यांचे मिश्रण तू पप्पू आणि मास्कवाल्या माणसाच्या मेंदूसोबत मिक्स करण्यात यशस्वी झालीस?"
पण निद्राजीता आश्चर्याने विचारू लागली, "पण पाच पेशीसमूह एकत्र? दोन मानवी आणि तीन प्राण्यांचे? हे कसे केले? वाईट टीम नुसार तर दोनच पेशीसमूह एकत्र होतात?"
सायली सांगू लागली, "आपल्या मुंबई ऑफिसमधील सायन्स अँड रिसर्च सेक्शन मधील डॉक्टर आणि सायंटिस्ट श्री राजमे यांच्या मदतीने, माझ्या आतापर्यंतच्या मेडिकलच्या ज्ञानाच्या आधारे आणि मी कमीत कमी वेळात जास्तीत जास्त ज्ञान इंटरनेट आणि इतर पुस्तकांतून आत्मसात करून हा प्रयोग यशस्वी केला आहे. फक्त मर्यादा एकच की दंडगोल मधले लिक्विड मर्यादित असल्याने मी एकच मिश्रण तयार करू शकले!"
सुनिलच्या आनंदाला पारावार राहिला नाही, "म्हणजे तो तयार झाला? व्हेरी गुड सायली, माय ब्युटीफुल वाईफ! त्याचा मला फार उपयोग होईल कारण त्याच्यावर बसून मी आकाशात उंच उडत उडत या विचित्र प्राण्यांशी होणाऱ्या आपल्या लढाईत लाल वर्तुळाद्वारे मानवी आणि यांत्रिक असे प्राणी पक्षीं यांच्यात भेद करू शकेल आणि मानवी प्राण्यांना टार्गेट करून त्यांना मारू शकेन!"
"होय सुनिल! नक्कीच! तो तयार झाला आहे. बस, फक्त त्याला या जगात ऍडजस्ट व्हायला अर्धा तास लागेल!", सायली म्हणाली.
क्लिफ्टोन ह्या अतिवेगाने उडणाऱ्या पक्षाचा (falcon ची एक प्रजाती ) आणि युनिप्तस (sail fish ची प्रजाती) या वेगाने पोहणाऱ्या जलचर प्राण्याचा आणि जमिनीवरील टर्मिस (cheetah ची प्रजाती) या अति वेगाने धावणाऱ्या प्राण्याचा असे तिन्ही सुपर नेचर बेटावरचे पेशी समूह बनवून सुनिलने सोबत आणले होते. सारंगने जुहू बीचवरून ताब्यात घेतलेले दोन पेशीसमूह (पप्पू भुसनळ्या आणि तो मास्कवाला गुंड ज्याचे वाईट टीममधले नाव होते डिश अँटीनाडू) घेऊन सायलीने त्यात जनुकीय बदल केले आणि मग ते त्या तीन प्राण्यांच्या पेशीसमूहासोबत एकत्र करून आकाश पाणी जमीन तिघांमध्ये संचार करू शकेल असा अद्वितीय आणि अद्भुत प्राणी मानव तयार केला होता.
सुनिल आणखी काही म्हणणार तेवढ्यात तो प्रचंड हत्ती तिथे आला आणि त्याने सुनिलला सोंडेने दूर ढकलले. सुनिल घसरत जवळच्या पुलाच्या कठड्याला जाऊन धडकला. तो हत्ती त्याच्याजवळ आला, हसायला लागला आणि म्हणाला, "मी जग्गू भुसनळ्या आहे. मला तुरुंगात टाकलं होतंस! आता बघ तुझी काय हालत करतो ते!"
सुनिल साध्या वेशात होता कारण लोकांसाठी डिटेक्टिव्ह निगेटिव्ह हा जखमी होऊन हॉस्पिटलमध्ये होता. त्यामुळे जग्गूने सुनिलला ओळखले होते.
त्या हत्तीने आपल्या पायाखाली तुडवायला पाय उचलला तेवढ्यात सुनिलने झिरको स्वरूपातला पोशाख खिशातून काढला होता आणि त्यावर फुंकर मारली होती. तो पोशाख मोठा झाला आणि सुनिलने तो घातला. रणजित यांनी दिलेल्या सगळ्या पोलिसी ट्रेनिंगचा उपयोग करायची वेळ आली होती.
आता काळा कोट, पोशाखाला अखंड जोडलेली काळी हॅट, हॅटला ओपन क्लोज होऊ शकेल अशी सरकती खिडकी, हॅटच्या आतमध्ये भरपूर झिरको टेक्निकच्या सूक्ष्म वस्तू आणि काळा गॉगल असा डिटेक्टिव्ह निगेटिव्ह आणि त्याच्यासमोर त्याला मारायला टपलेला प्रचंड हत्ती असे दृश्य त्या पुलावर दिसत होते. तिथे उभे असलेले लोक हा अद्भुत प्रकार बघत जागीच थांबले होते. मग त्यांना दिसले की काळ्या कोट वाल्याने आपल्या पाठीमागे हात नेले. तोपर्यंत त्या हत्तीने त्याच्या पोटावर पाय द्यायला वर उचलला तेवढ्यात सोंडेला धरून कोटवाला हत्तीच्या पाठीवर चढला आणि हत्तीच्या मागच्या बाजूने पुलावर उडी मारली. हत्तीचा जड पाय सुनिलने एका गॅजेटच्या मदतीने पुलाच्या डळमळीत केलेल्या भागावर जोरात आदळला आणि पुलाचा तेवढा भाग कठड्यासहित तुटला आणि हत्तीचा तोल जाऊन तो पुलाखाली धापकन पडला. पडल्यावर थोडा वेळ तो नदीच्या पात्रात तसाच पडून होता. सगळ्यांचा समज झाला की तो हत्ती मेला.
शेवटी सुनिलने जाहीर केले, "संचेती हॉस्पिटलमध्ये जो आहे तो नकली आहे. मी आहे खरा डिटेक्टिव्ह निगेटिव्ह!"
तिथे न्यूज चॅनलवाले येऊन पोहोचले. सगळीकडे ही खबर पसरली.
सुनिल पुढे तिथल्या आणि एकूणच टीव्हीच्या दर्शकांना उद्देशून म्हणाला, "एवढेच नाही तर मुंबईला कारने जातांना ज्यांच्यावर हल्ला झाला त्या दोन्हीही नकली निद्राजीता आणि मेमरी डॉल आहेत! खऱ्या दोन्ही मुंबईत आहेत. लोकानो, घाबरू नका. वाईट टीमने जणू काही युद्ध सुरू केले आहे! आपल्याला सगळ्यांना मिळून ते युद्ध लढायचे आहे! कदाचित वाईट टीम आजच त्या दोन्ही व्हीआयपीना किडनॅप करू शकते! त्यामुळे आम्ही सावध आहोत!"
न्यूज चॅनेलवर सुनिलने दिलेल्या स्टेटमेंटमुळे वाईट टीमनेपण लवकरच एक छोटा व्हीडिओ सगळीकडे प्रसारित केला ज्यात अंधारात एक मास्कवाला माणूस म्हणत होता, "तुम्हाला वाटतंय आम्ही आजच त्या दोघं व्हीआयपीचे अपहरण करू? बरोबर ओळखलं. आजच करू आम्ही त्यांचं अपहरण! पण या सगळ्या प्राण्यांपासून सामान्य लोकांना वाचवाल की दोघं व्हीआयपींना वाचवाल की मग आम्हाला अवकाशात पळून जाण्यापासून वाचवाल? आणि मी सांगतो आमचं ठिकाण कुठे आहे ते!! खंडाळ्याच्या घाटात पर्वतांमध्ये आहे ! चॅलेंज देतो की आम्हाला शोधून दाखवा! एक दोन हुशार चाली खेळून तुम्हाला वाटलं बुद्धिबळाचा डाव तुम्ही जिंकाल? माझेजवळ तुमच्या पेक्षा जास्त वजीर, हत्ती, घोडे आणि प्यादे आहेत! अरे मूर्ख डिटेक्टिव्ह निगेटिव्ह, तुझी आणि तुझ्या "स्वागत" टीमची अशी "वाईट" हालत करतो ना, की आयुष्यभर रडत बसशील आणि तुझं स्वागत करायला गल्लीतलं कुत्रंपण येणार नाही!!"
मग तो भेसूर मास्कधारी माणूस मास्कच्या आतमधून हसायला लागला आणि व्हीडिओ संपला. स्वागत टीमला या व्हीडिओबद्दल कळले.
डिटेक्टिव्ह फोनवर इतर तिघा सुपरहिरोना म्हणाला, "च्यायला हा व्हायरसिक! याला काय माहीत की बुद्धिबळाच्या खेळात त्याच्याकडे जरी वेगवेगळ्या प्रकारच्या प्याद्यांची संख्या जास्त असली तरी माझेकडे, त्याने कधीही न पाहिलेले असे नवीन प्यादे आहेत!"
काही वेळातच सुनिलच्या आदेशानुसार मुंबई आणि पुणे शहरात स्वागत टीमचे फायटर्स असलेले काही हेलिकॉप्टर्स उडतांना दिसत होते.
दरम्यान, तो पक्षी प्रचंड वेगाने मुंबईहून निघाला होता, डिटेक्टिव्ह निगेटिव्हकडे!
^^^
