उद्धव उवाच -

विद्रावितो मोहमहान्धकारो, य आश्रितो मे तव संनिधानात् ।

विभावसोः किन्नु समीपगस्य, शीतं तमो भीः प्रभवन्त्यजाद्य ॥३७॥

जो सकळदेवचूडामणी । जो यादवांमाजीं अग्रगणी ।

जो अविद्यारात्रीचा तरणी । जो शिरोमणी ब्रह्मवेत्त्यां ॥७३॥

ऐशिया श्रीकृष्णाप्रती । स्वानंदाचिये निजस्फूर्ती ।

उद्धवें सांगतां निजस्थिती । त्यामाजीं करी स्तुती आद्यत्वें हरीची ॥७४॥

मज तंव विचारितां । ब्रह्मा सर्वांचा आदिकर्ता ।

तोही नारायणनाभीं तत्त्वतां । होय जन्मता ’अज’ नामें ॥७५॥

तो तूं कमळनाभि नारायण । मायासंवलित ब्रह्म जाण ।

ते मायेचें तूं आद्यकारण । आद्यत्व पूर्ण तुज साजे ॥७६॥

अविद्येच्या महारात्रीं । अडकलों होतों मोहअंधारीं ।

तेथूनि काढावया बाहेरीं । आणिकांची थोरी चालेना ॥७७॥

तेथ तुझेनि वचनभास्करें । नासोनि शोकमोह अंधारें ।

मज काढिलें जी बाहेरें । चमत्कारें संनिधीं तुझ्या ॥७८॥

तुझिये संनिधीपाशीं । ठाव नाहीं अविद्येसी ।

तेथ मोहममता कैसी ग्रासी । हृषीकेशी तुज असतां ॥७९॥

अंधारी राती अतिगहन । तेथ शीतें पीडिला जो संपूर्ण ।

त्यासी आतुडलिया हुताशन । शीत तम जाण तत्काळ पळे ॥६८०॥

तो अग्नि सेवितां स्वयें सदा । शीततमांची भयबाधा ।

पुढती बाधों न शके कदा । तेवीं गोविंदा संनिधीं तुझ्या ॥८१॥

तेवीं शोकमोहममतेशीं । माया जन बांधे भवपाशीं ।

ते तुझिये संनिधीपाशीं । जाती आपैसीं हारपोनी ॥८२॥

मरणजन्मां अपाये । मागां अनेक सोशिले स्वयें ।

ज्यासी तुझी संनिधि होये । त्यासी तें भवभये समूळ मिथ्या ॥८३॥

तुझे संनिधीपाशीं जाण । समूळ मायेचें निर्दळण ।

तेचि अर्थीचें निरुपण । उद्धव आपण सांगत ॥८४॥

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel

Books related to श्रीएकनाथी भागवत


श्रीएकनाथी भागवत