अहेव मरनाची मला हाई आवड

म्होरं पतीपुत्रं मागं कुकवाची कावड

अहेव मरनाची सयानु मोठी मौज

म्होरं चाले कंथ, माग गोताची फौज

अहेव मरन येवं असलपनांत

घ्याईला जागा तुळशीच्या बनामंदी

अहेव मरन, सोमवारी सवापारी

कंथ चांदवा देतो दारी

सरगाच्या वाटे हळदकुकवाचा सडा झाला

अहेव नारींचा गाडा गेला

अहेव मरन अंगनला देई शोभा

कृष्णाकडेला कंथ उभा

अहेव मरन भाग्याच्या नारी तुला

सोन्यारूपाची फुलं कंथ उधळीत गेला

अहेव मरन सोमवारी रातीयेचं

पानी कंथाच्या हातीयेचं

अहेव मरन येवं, पित्याच्या दारापुढे

बंधुला सांगते, सरलं माह्यार तुझ्याकडे

१०

अहेव मरणाची चिता जळे साउलीला

दु:ख आगळं माऊलीला

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Comments
आमच्या टेलिग्राम ग्रुप वर सभासद व्हा. इथे तुम्हाला इतर वाचक आणि लेखकांशी संवाद साधता येईल. telegram channel