जात्या ईसवरा जड जाशील दाटूयीनी
तुझ्या शिनयीची आनू सौंगड कुठूयीनी ।
मोटयाचा नवयीरा काळ्या वावरी थापयीला
नवर्याच लई गोत सांगा नवरीच्या बापायीला ।
मोठयाचा नवयीरा परण्या निघाला दुपायीरा
बाळावरन माझ्या लिंबू नारळ उतरा ।
मोठयाचा नवयीरा परण्या निघाला झाडीतूनी
बाळ माझ्या शिवाजीला सया बघती माडीतूनी ।
नवरीचा बाप बोल तुमचं वराड का वो थोडं
नवर्याचा बाप बोल मामा मंडाळ गेलं पुढं ।
मांडवाच्या दारी नवरी कापली दंडाभुजा
माझी तू प्रेमिला तुझ्या पाठीशी मामा उभा ।
मांडवाच्या दारी बामन बोलतो मंगायाळ
आई बाप बोल लेकी जलम वंगायाळ ।
मांडवाच्या दारी बामन बोलतो सावधान
मामा मामींनी केलं भाचीला कन्यादान ।
जावयाला दिली पाच भांडी जेवायाला
माझी ती प्रेमिला साव्वी समई लावायाला ।
मामाच्या पंगती भाचीबाईचं सवयीळ
मामी वाढीती जेवायाला मामा बसतो जवयीळ ।
लेकाच्या लगनात हळदी कुंकवाचं बोट
बंधूच्या लगनात चोळी पातळाची अट ।
अहराचं धनी तुमी बसाना खाली वरी
बंदुचं पातायाळ मी झेलीते वरच्या वरी ।
जोंधळ्याचा पाय नको लावू तू गरतीबाई
देव गेल्याले आले नाही ।
भैनाला मागयीन आम्ही कोणाची कोण द्यावी
भैना माझ्या शामयीच्या चुलत्याची पूस घ्यावी ।
भैनाला मागयीन आम्ही कोनाची देणायार
माझ्या गं शामयाची चुलती किल्ल्याची येणार ।
माडीचा जानवस कोण पुसती हावयीशी
बाळ माझ्याची नवर्या मुलाची मावशी ।
माडीचा जानवस कोन पुसती यीयीना
भैना माझ्याच्या नवर्या मुलीची बहियीना ।
माडीचा जानवस कोन पुसती घाई घाई
माझ्या ग x x x ची नवर्या मुलीची आई ।
मांडवाच्या दारी हंडा शिजतो रंगायाचा
चुडयांना माझ्या व्याही मिळाला ढंगायाचा ।
मांडवाच्या दारी चरवी सांडली तेलायाची
नवरीच्या बापांनी तूळ मांडली मालायाची ।
