त्रैलोक्याचा स्वामी जनार्दना । केला व्यापार ह्यापासून ॥ १ ॥

मोठा लागला व्यापार । रामनाम निरंतर ॥ २ ॥

सोहं कर्जखत दिधलें । तें म्यां मस्तकीं वंदिलें ॥ ३ ॥

महा प्रेमाची लुगडीं दिधलीं । निजमुक्तपणें प्राप्त झालीं ॥ ४ ॥

अनुभवाची तहसील समस्त । स्वामीस करुणा पाठविली रिस्त ॥ ५ ॥

धर्म खर्डा जमा । खर्चीं घातलें पूर्वकर्मा ॥ ६ ॥

संतांसंगें वसूल बाकी । भक्ताहूनि अति नेटकी ॥ ७ ॥

कैवल्यपुरीं बांधलें तोरण । चैतन्य चावडी बैसलों जाण ॥ ८ ॥

ऐसा व्यापार सिद्ध झाला । एका जनार्दनीं केला ॥ ९ ॥

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel